الرأسمالية التونسية

 طفل صغير يسال في بوه : بابا .. بابا .. شمعناها الفساد السياسي ؟؟
قالو : ولدي راك مزلت صغير نمنجمش نقلك عالحجات هذي راك متفهمش . أما هاو باش نقربلك الموضوع :
 توا أنا نصرف عالدار   يعني إسمي الرأسمالية .
أمك . لاهية بيك و بخوك و بشؤون الدار . يعني إسمها الحكومة .
 إنتي. تحت تصرفنا يعني إسمك الشعب ..
خوك الصغير . هذاكا أملنا و حلمنا  يعني إسمو المستقبل..
 الخادمة . تعيش من ورانا   يعني إسمها القوى الكادحة
 أيا برا توا يعيش ولدي اقرى في بيتك و كان فهمت حاجة قلي غدوة :)
*****
في الليل أك الطفل تقلق في النوم منجمش يرقد  قام مالفرش يسمع في خوه الصغير يبكي ( عملها في الكوش )  مشى يسكت فيه محبش يسكت . مشى يقيم في أمو باش تسكتو   لقاها راقدة تضرب فيه خميري محبتش تقوم .. بوه موش موجود في الفرش مع أمو . مشى يلوج على بوه  ياخي يسمع فيه في البيت مع الخادمة . طل  مالباب لقاه راقد معاها في الفرش يضحكو همسات و قبلات و شايخين ... لا علاقة بالوضع ....
*****
 أكاهو عاد من غدوة عالفطور الطفل قال لبوه :
بابا  راني عرفت شنوة الفساد السياسي
قالو :  تبار الله على ولدي شنوة عرفت
قالو :
عندما  تلهو الرأسمالية بالقوى الكادحة و تكون الحكومة نائمة  في سبات عميق  فيصبح  الشعب تائها مهملا و ترى المستقبل يصرخ و هو غارقا في القذارة  فهذا هو الفساد السياسي يا أبي 
قالو بوه : يلعن بوك كيفاش طلعتها ؟؟

 

الغنوشي ( قطر ) = الرأسمالية
 المرزوقي = الحكومة ( يجبد فيه خميري )
 الشعب التونسي =  الشعب
المعطلين عن العمل من أصحاب الشهائد العلي =  المستقبل
 انصار النهضة و الفقراء = القوى الكادحة
 عندما يلهو الغنوشي  بالفقراء  و يعدهم بوعود إنتخابية كاذبة و يكون المرزوقي نائم في سبات عميق و  بلا صلاحيات فيصبح الشعب التونسي قلقا عالثورة و فاقدا للأمل على تحسن وضعه الأجتماعي و يصبح  السباب  المعطلين عن العمل  حارقين مالبلاد على قوارب الموت  . فذلك هو الفســــــاد السياسي التونسي 

A.C.A.B

لم أكن يوما سلفي و لكني دافعت عليهم في أكثر من مرة  . تستفزني تصرفاتهم  و ك زرقتلهم برشا زرارق على  خاطر  تعطبهم و تطرفهم  و لست مساندا لتحرك لنصرة الرسول صلى الله عليه و سلم . للأن نصرة الرسول لا تكون إلا بأخلاق الرسول . لكن فرحان كيف الشعب فش غيضوا في أمريكا  و سفاراتها .
 و لكن تونس اليوم   وسط قمع بوليسي لم نعهده من نظام بن علي  . المرة هذي قتــــــــــــل  عيني عينك    إي نعم بوليس تونس  قتل 4 مواطنين توانسة . ماكش مصدق ؟  ( شوف التصاور  الصور لوطا ) رصاص أمريكي  يقتلوا بيه مواطنين توانسة  هذا ما جنته علينا حكومتنا الشرعية .إلي إنتخبناها و دافعنا عليها في أكثر من مناسبة ؟  عملها و عملناها بيدينا . 
و الله كل يوم يزيد كرهي لوزارة الداخلية و كلابها و وزيرها  فرغم كل شي لا  أقبل  و لن أقبل  أن يقتل فرد من الشعب التونسي  بهذه الطريقة الوحشية مهما كانت إنتمائاتهم .  لإاين أنتم يا حقوقيين الهانة ؟ اين أنتم يا رؤساء الأحزاب ؟  أين أنت يا سيد ديلو يا وزير حقوق الأنسان ؟  و إلا خاترو سلفي باش تسكتوا ؟  أكيد هذه الحادثة ستمر مرور الكرام   فلا أنتظر من نهضاوي طحان للحكومة  أن يتكلم   و يحل جلغتو  ضد  علي العريض و حمادي الجبالي ولي نعمتو . و لا من معارض كاره للسفيين أن يندد بوحشية البوليس 
ربي يرحم إلي ماتو . هذي حكومتنا الإسلامية و هذي  حقوق الإنسان في بلد الأمن و الأمان .

ستالين الصغير

 شكري بلعيد, الناطق الرسمي لحركة الديمقراطيين, هذا الذي لا يعرفه الشعب إلا في التلافز
لمارك إلي كيفو  موجودين في العالم أجمع...ناس مرضى يتزحلقو بين الحيط وقشرة الدهن...يعرفو وقتاش يسكتو ...ووقتاش يبهبرو ويسبو...في المطلق هوما جبناء...  مهمتهم الوحيدة  إتهام الخصوم السياسيين بالعمالة للخارج و خاصة الصهيونية و الإمبريالية و تلك التّهم الجاهزة تدلّ على العجز عن المواجهة.
 نحب نسإل بلعيد شكون يمثل؟؟؟قداش عند حزبو من بلاصة في التأسيسي؟؟؟نحب نعرف لوكان موش من الصحافة المتواطئة وإلي تخدم بفلوس التوانسة الي سرقها المخلوع وإلي شراهم بيها قبل ما يهرب...شكون يسمع بيه؟؟؟إنسان جالغ...قسمات وجهو متاع إنسان في حالة إستنفار قسوى...يسب ويشتم من غير مبرر...ما عندو حتى شرعية في البلاد...

إلي يسمع إسمو يستعوذ من الشيطان الرجيم... .يحدث في التوانسة ناس تشهق ما تلحق لاهية في همها يحكيلهم على العنف الثوري وقوة السوفيات الأعلى والرفاق واللينينية وسخطة على مخو...الناس طلعت للقمرة وهو يحكي على البولشيفية...في تونس...مالة علاش إنلومو على الوهابية  ونقولو هاي نظريات مستوردة؟؟؟ونظرية شكري بلعيد موش مستوردة؟؟؟ المصيبة الكبرى  إلي ها النظرية الناس الي خلقوها قالو لشعوبهم يا شعب سامحنا رانا غلطنا وربما راهم خلصو لعباد على الضرر الي لحقهم...ولاخر قرى كتاب متاع أنور خوجة عجبو قال لازم   نطبقو في تونس...والله لوكان جات عندك قاعدة شعبية  واسعة مليون  و إلا زوز ملاين والله نقلك  عندك  حق و إن شاء  تعلن امها الجمهورية التونسية الشيوعية اللينينية البلعيدية...ونعملولك مدينة اسمها بلعيدقراد...أما يا رسول الله تتفيسخ على لعباد وتحرض في الناس على العصيان المدني كي الشيطان الرجيم وانت ما وراك حد...وما
يعرفك حد...ولا حد فاهمك ولا يحب يفهمك...
   (  أون + ) هذا الفقاموس - الديمقراطي جدّا-  لا يأمن بوجود حركة ذات مرجعية دينية لأنّ الدين أفيون الشعوب و يرى أنّ المعركة معها هي معركة وجود و ما أكثر المعارك الوهمية التي خاضها هذا البوهالي  . و من طرافة  هذا الأخير  أنه يعتبر  النهضويين  طارؤون على الإسلام و يرى نفسه  امتدادا للطاهر و الفاضل بن عاشور هههههههههه

حزب الهمال الهمامي

لما أيقن الشيوعي حمة... أن الاسلام متجدر في هده الأمة... وأنه منهزم لامحالة ومغلوب غذا أصر على أن الدين أفيون الشعوب... وأن الإسلام خرافة إقطاعية... جاءت في نهاية الحقبة الجاهلية... إتخذ بكل حزن وألم... قرارا كان أمر عليه من تجرع السم... ثم جمع من حوله الرفاق... ووضع الساق على الساق... وصب كأسا من خمرة المرناق... حمراء شيوعية المذاق... وقال أيها الرفاق...لا مفر لنا من النفاق... وإني بعد تفكير عميق وموضوعي... قررت أن نتخلى عن كلمة الشيوعي... لعلنا نحصد بعض الأصوات... من الغافلين والغافلات.. 

حقائق طرد الرئيس المرزوقي من حفلة مرسال خليفة بالجم

على هامش زيارة السيد منصف المرزوقي لحفلة مارسال خليفة بالجم


الحمد لله الذي رزقني عينين و اذنين لارى و اسمع بهما. البارحة رأيت و سمعت ما حصل بقصر الجم أثناء حفل مارسال خليفة و حضور السيد منصف المرزوقي. حقيقة يؤسفني ان أقرأ على بعض صفحات الفايسبوك تعابير مثل "استهجان" "استهزاء" "المرزوقي غادر غاضبا وسط إستهزاء الجمهور" ... حتى انه خيل الي اني لم أحضر الحفل ..و طالما اننا لا نريد اعلام الاثارة بل نرنو الى ان نساهم في الانارة فلا بد ان نشير انه عند قدوم الرئيس استقبله الجمهور بالتصفيق الا فئة قليلة كانت تجلس أعلى يمين المدارج -ورائي مباشرة- تتركب من حوالي 10 انفار يحملون شعارا كتب عليه"مناضلوا حركة الشعب بالكساسبة :لا ربيع عربي بدون تحرير فلسطين" -الكساسبة هي منطقة مجاورة للجم- وقد صرخوا صحبة بعض الناصريين و البوكت،منددين بقدوم لرئيس. اثر ذلك، استمتع الجميع بالحفل فغنى مارسال فابدع و تسلطن فامتع و أطرب الجماهير التي تفاعلت و غنت معه.و خلافا لما تنشره بعض صفحات الفايسبوك فاني أقسم بأغلظ الايمان ان السيد المنصف المرزوقي أتم الحفل الى اخره و لم يغادره ساخطا كما قيل حيث في ختام الحفل، خرج الرئيس تحت تصفيق الجمهور الذي كان واعيا و حضاريا الا بعض الافراد أرادوا ارسال رسالة الى الرئيس و عبروا على موقفهم الرافض للزيارة بالتصفير و علينا ان نقبل ذلك فهذا يدخل في باب الديمقراطية و حرية الافراد في التعبير.
ان اهالي الجم لهم من الوعي و النضج ما يمنعهم من التهجم على الرئيس او اي ضيف اخر مهما كان اختلافهم الايديولوجي معه.نحن قوم تعلمنا ان نكرم ضيوفنا و نحسن استقبالهم بالتالي كفانا تزييفا للحقائق و لنكن اداة انارة لا اثارة...

                                                           

touche pas ma bledi

يالّي سيّبتو اللّب وشادّين في القشور  يالّي فاتكم البابور

وخسرتو الطرح وبدّلتو المريول وبحّحتو الزّكرة و نقبتو الطبول وفلقتو المزود ووسّعتو المحلول

مهبول من ياخذ منكم القول  ومهبول من يحسب في روسكم عقول

والشعب اللي بعتوه بالفول  يبيعكم بالقشور  

اليسار عمل العار

بينما كنت أتابع نشرة الأخبار, في إحدى قنوات العار, اذ بأحد وجوه اليسار , ممن ينتمي للقطب أوما يعرف باليسار, ألجمه الله بلجام من نار, يزايد على المناضلين الأحرار. فقد تحدث بأسلوب بغيض, ينم عن خيال مريض, ورغبة في في التشويه والتحريض, فطالب المرزوقي بالأستقالة و هو أمر جائز لا محالة ؟


 ثم شرع في السخرية والتنديد, بأسلوب ركيك وبليد, متناسيا كل فضائح حركة التجديد, التي إنتمى إليها عشرين عاما أو يزيد. وصحيفتها الطريق الجديد, التي كان يمولها الدكتاتور, ويهتم بها كجزء من الديكور, كي تكون شاهدة زور. مقابل مواقف سياسية, من بينها مساندة التجمع في القضاء على الخوانجية, وتبرير ذلك أمام الأطراف الخارجية. بتصوير الأمر على أنه صراعات مصيرية, بين بن علي ودولته الحداثية, وبين أطراف متطرفة رجعية. ولقد أكرم بن على الكثير من اليساريين, وجازاهم على وقفتهم معه ضد الاسلاميين, بأن إتخذ منهم المستشارين, كما إتخذ منهم الوزراء, وعين منهم السفراء, ولدينا قائمة بكل لأسماء. فهل انعدم في وجوهكم الحياء , أيها الجبناء؟ 
هذا غيض يسير, ولازل لدينا الكثير

الفنون و معرض القلصون

كنت مارا لقضاء بعض الشؤون, فمررت بجانب فضاء الفنون, وإذا بالناس يتهامسون, عن علاقة الفن بالقلصون, فقلت لعلهم بين الفن و العفن يخلطون؟ ثم أخذني الفضول, فعزمت على الدخول و ما كنت أدري أنه أمر جلل مهول, و إستهزاء بالله وبالرسول. ما أن دفعت الباب ودخلت الى البهو, حتى وجدت حفنة من بني علمان في لعب ولهو, . فاقتربت منهم لأشاركهم الحديث, حتى وقع نظري على السياسي الفاشل وأخيه الخبيث. فأشحت بوجهي نحو الجدار, فإذا بشيء يعمل العار. فصحت بنجيب وعصام. أتركتما الدستور والقانون. وجئتما للتفسح في معرض القلسون؟ ثم لعنت الشيطان . وقلت لعلني أسات الظن ببني علمان . فلعل كل في الأمر أن إمرأة ديمقراطية. ممن يعبرون بالفرنسية, قد نزعت ملابسها الداخلية, كي تنعم ببعض الحرية, وسط هذه الزمرة الحداثية. أو لعل زعيم الحزب الجمهوري وبعد أن أعرض عنه الناخب أيما اعراض, جاء يبحث عن سترنغ مثير لحكومة الانقاذ. الذي لفظه الشعب ورماه كورق في مرحاض. ....


تركت السياسيين. أبناء الشابي وغيرهم من الفاشلين. في لهوهم خائضين. وغادرت البهو باتجاه اليمين. لأنظر في لوحات الرسامين. وأتيكم بالخبر اليقين. فإذا بواحدة من بنات أعتقني. بجسد نحيل. ولباس قليل. ولسان طويل. بادرتها بالسلام, على طريقة الإسلام. فأقتربت مني وعنقتني. فأستغربت أيما إستغراب, وأصابني العجب لا الإعجاب. ماكل هذاه القبلات والتعنيق, وما أنا لها بقريب ولا صديق؟ وأقول لك وصدقني ,أن أكثر  ما يقلقني , أن هذا الكائن من بني أعتقني, لم أعرف ان كان ذكرا أم أنثى, لا بد من الفحص التقني. ولقد شممت عليه مزيجا من رائحة البيتزا والمالبورو . وبارفان من نوع البودورو.  فنزلت ببهو المعرض و تكلمت مخاطب الجاهلون   :



أيها الفنانون ، يا أيها الجهلة و المستبدّون يا من ضربتهم البهامة فهم متخلفون، أفلا تفرقون بين الدين و بين الفنون ؟ نحن لا نعيب عليكم جهلكم ولكنكم لماذا علينا تتمنيكون ،؟قلنا لكم إحترمونا سوف نكون لكم محترمون . لعنتكم الأرض والسماء إنكم لمنافقون، إني لم أركم في شيء تفلحون، ولا على الطيارة أنتم لي ضاربون، إني أراكم لي فيه لخارون، المعارضة منكم والفنانون ، حاشى صلاحكم وهم لأنفسهم عارفون،


و غادرت المكان لاعنا البلاد و البهامة التي أصابت العباد

المنصف وحمادي, وتسليم البغدادي

قال حمادي الجبالي... وهو يبتسم ولا يبالي.... لقد أوفيت بوعودي.... وسلمت البغدادي المحمودي.... عملا بقرارات القضاء... وعلاقات المحبة والإخاء... ووفاء لدماء الشهداء... وقد وعدني عبد الرحيم الكيب... بأن لا يتعرض البغدادي لسوء معاملة أو تعذيب... فهذا الرجل إجتاز الحدود خلسة... ودخل تونس مسلحا من دون رخصة... وهو متهم بجرائم إغتصاب وفساد... فلا أهلا ولاسهلا به في البلاد... غير أن الرئيس المرزوقي... المناضل الحقوقي... أغضبه القرار... فنزع برنوسه وثار....و قال  لقد جلبتم لي الخزي العار.... ثم طلب من عدنان منصر... أن يرفع الأمر لمجلس بن جعفر... ليفصل في الامر ويقرر... بمساعدة أهل الاختصاص وعلى رأسهم ابراهيم القصاص......و للقصة بقية  .....

حوار بين الأعرابي

حدّثني بجبوج إبن بحبوح قال:

كنت أمرّ ببلاد الشام قاصدا سوق العصر أبتغي التجارة فإعترضني أعرابيّ يقال له أبو الفشلام  فقال لي هل أدلّك على دعاء تقوله كلّ يوم خميس قبل أن تنكح ما ملكت يمينك وشمالك فيجعل لك الله شأنا بين الفيسبوكييين في بلاد القيروان؟ فقلت هات ما عندك يا حيوان، فقال إنّي كلّما دخلت على الأدمين مندس وهو يستعدّ للكتابة سمعته يقول:

"نحمد الله رب العالمين ونتوجّه له شاكرين إذ جعلنا من عباده المحسودين لا الحاسدين ومن المنبّر عليهم لا من المنبرين ، سواء في الدنيا أو في عالم التدوين. ونسأله أن يجعلنا دائما من القوم الشايخين المتفرهدين، وأن يغفرلنا كان عملنا كعبتين مابين يوم السبت ويوم الإثنين، فهو الأدرى بما نعاني من عباده المتخلفين وهو أرحم الراحمين. سبحانك يا ربّي آش خلقت وآش صوّرت،ومن الهوكش آش كثــّرت، ... يا ربّي خفـّف من البهامة على عبادك الفشلامة قبل ما يجي نهار القيامة وما فيها باس زادة كان تسخطنا كلّ مرّة هكّا بـ600 مليون كاش وإلاّ تحويل، باش نتفرهدو شويّة قبل ما تبعثلنا عزرائيل ونرتاحو من الخدمة نهار وليل بجاه سيدي بومنديل" 

فقلت ويحك يا أعرابي، والله ما سمعت في حياتي مثل هذا الهراء وما كان الأدمين مندس يوما من أهل الدين والدعاء، بل هو من أصحاب الجعّة الممتازة والنّساء، وجلسات الخمر والبغاء، فقال الأعرابي: إخرس يا ببّغاء يا ثعلب الصحراء، ما أنت بفيسبوكي ولا كنت يوما من القرّاء، بل فشلام على البسطاء ولحّاس للأمراء ونسناس على الوزراء... وإستلّ الأعرابيّ سيفه وهمّ بضرب عنق التيجاني النطّار لولا مرور قافلة تسير وعلى رأسها الباجي قايد السبسي الذي توجّه لأبي كليبة وهدّأ من روعه قائلا: صلّي عالنبي يا ولدي، راكم أولاد حومة... فقال كليبة: بصحّتك يا ولد الـ... وقفتلك فيها الرجال، وإنصرف التيجاني حامدا شاكرا لله على حفظ رقبته من سيف الأعرابي وأقسم بأغلظ الأيمان أن يلغي إشتراكه بشبكة الإنترنت ويكتفي بتجارة الأنعام من الإبل والأغنام والسلام عليكم وعليكم السلام 

لوقتاش ؟؟؟؟؟

تحذير لطحانة الحاكم و المعارضين

خمسين عام و إحنا بمرض  (  البوسكوت) مبلين
بطالة  و أفامنا مسكرة و زيد مقهورين
و هابطة علينا عصاة الذل و الطحين
و لا حد لقالنا دواء يشفينا و يخلينا مرتاحين
و يخفف علينا الذل إلي كنا هازين
لين عمناول هداولنا ثورة مكتوبة بدم المظلومين
رتحنا من هالمرض و وينا نضحكو ديما شايخين
 أما خسارة ثورتنا إدعثرت في زبلة معبيية بالعلمانيين
جراثيم تجمعيين توا يسميو أرواحهم بالدستوريين
 زيد جاو معاهم كمشة قرودة صحافيين و فنانين و حتى مسؤولين

هو صحيح إذا تقابلت  الجراثيم مع القرودة  نكونوا مالخاسرين
  أما و الله مناش باش نسلموا حتى لو كنا مالميتين
و مهما تكاثرت الجراثيم و مهما  كثرت جحافل القرودة المسخين
منسلموش في ثورتنا و مناش ساكتين
و حتى للسلفيين مناش ساكتين
و أهاوكا إسئلوا  علينا  أصحاب السلطلة السابقين

أتو يقولولكم شكون الشباب الثوريين

حكايات المندس

حدّثنا المندس الخرنار قال:


 في إحدى أسفارنا العديدة، في بلاد الرّوم البعيدة، حططنا الرّحال،في إحدى مدن الشمال، و في الحين  قصدنا دار صديق قديم، يدعى النبار الزّكيم، مجلسه دائما عامر بما لذّ و طاب، من الجواري الحسان و الندماء ذوي الألباب، فرحّب بنا الزكيم أحسن ترحاب، و بعد حديث الأحباب، في اللقاء بعد طول الغياب، دعا الزكيم أصحابه للسّهر، و وعدنا بليلة من ليالي العمر.
 فبدأ بتقديم خلّانه الأفذاذ، هذا أبو فارس و هذا أبو معاذ، فسألته: أهم من بلاد الشام أم من السّعوديّة، فقال : بل من أرض إفريقيّة، فتعجّبت من هذه الأسماء الغريبة، و توجست شرّا من هذه اللّيلة العجيبة، فليس هناك جوار و لا كؤوس، و النّدماء طوال اللحاء و في وجوههم عبوس،

فسألني أبو معاذ عن غايتنا من التّرحال، قلت لنحسّن الأحوال، و نجمع الأموال، فأجاب لقد أتيتم لأحسن مكان، الجالية هنا متكاتفة، و قلوبنا متآلفة، سنعينكم على تحقيق المراد، إن لزمتم سنّة 
الأجداد، و إبتعدتم عن وسوسة كفّار هذه البلاد، فتعجّبت من هذا الكلام، و لزمت الصّمت طلبًا للسّلام، فتكلّم عنّي المسمام، و كان يهوى المشاغبة و الخصام، فقال البلاد بلادهم، فكيف نتجنب 
كلامهم، و من قال هذا الهراء يا صديق، فاحمرّ وجه أبو معاذ من الغضب و الضيق، و قال كيف تجرؤ على هذا يا زنديق، لكن بما أنّك جديد في الميدان، سأشرح لك قدر الإمكان، و أدعو لك بالهداية و 
الغفران، إنّ هذا الكلام الفصيح، قاله شيخنا المليح، له موقع على الأنترنات، و ما أدراك ما الأنترنات، زوّاره بالمئات، يدعونا للرجوع إلى ما فات، و يعطينا أرشد الفتوات، فقلت زدنا ممّا عندك يا أبا معاذ، 


فقال بعد أن إستعاذ، نحن في بلاد الكفّار، و بفضل علمائنا الأبرار، نعلم أنّنا في دار الحرب و الجهاد، فنساؤهم حلال، و كذلك ما يملكون من أموال، فإن تحيّلت على مصرف يتعامل بالرّبا، فذلك يجوز 
و تحريمه من الغباء، فقلت لكن نساءهم ألا يكون في ذلك زنا، فقال الكافرة لك حسنة إن لعنتها، فما بالك إذ أنت نكحتها، فكانت القشة التي قصمت ظهر البعير، و تركنا صاحبنا يهذي بكلامه المنير، 


فاستنتج من صمتنا القبول، و أمضى اللّيل يفتي في أهم الأمور، كحكم النّوم على الظهور، و عدم إحترام إشارات المرور، ، و استعمال الجال و العطور، و التلفاز و الموسيقى و السّاعة، فلمّا 


أذّن الفجر صلّيناه جماعة، و عزمنا على الرّحيل من تلك البلاد، قبل أن يعلنوا علينا الجهاد، و يهدروا دمائنا للعباد، فشكرناهم على الإعانة، و انتفاخ المثانة، و حتّى ننسى تلك الزنزانة إتجهنا إلى 


أقرب حانة

رمزي بالطيب و حرية الصحافة

  اعبر بإسمي الشخصي عن كامل تضامني ومساندتي للشاب و الصحفي   رمزي بالطيبي في إضرابه  الذيي يقوده ضد القضاء العسكري وهيبته المزيفة التي باتت تهدد حرية الصحافة والحق في المعلومة. رمزي كان قد دخل في إضراب جوع  منذ الإثنين 28 ماي، على خلفية إفتكاك الجيش"  كاميراته عند تغطيته لجلسات المحكمة العسكرية بالكاف، في  قضية  قتلة شهداء تالة و القصرين يوم 21 ماي الماضي.




يا عمار يا تكركيرة يلي خايف من تصويرة 

كليــــــــــــــــمة

لا أخفي عليكم يا أصدقاء أنّ للفيس بوك طعم أضحى أقرب إلى الزوال، وأنّ الصفحات التونسية أصبحت مرتعا للهمّال وفاضي الأشغال، وقد شهدتم على عديد الصفحات، ، كيف أنّ الحوار لم يعد حول الأفكار، وأنّ الثورة لم تعد هي الإطار، وأنّ المكان أصبح للتفوريخ والشجار، بين الدعاة الإلكترونيّين وبين فريق من الكفّار، كما كنّا لاحظنا جميعا كيف أنّ عددا من أصحاب الصفحات القيّمة والمشهورة، قرّروا باش يخطفوا الدورة، وتركوا الفيس بوك التونسي مرتعا للجبورة، أصحاب الأفكار العورة، ومستويات "ليه بتقصّر تنّورة"، وهذا لا محالة وضع تعيس، لا يرضاه إلاّ الخسيس ذلك أنّ غياب الحوار يجلب للجميع العار، فتنظر إلينا الأمم بإحتقار، وتحدث القطيعة بين هذا وذاك التيّار، ويعتكف أوّلهما في الجامع والثاني في البار، في حين أنّ الجميع هاززهم نفس التيّار، متاع نفس الواد الهرهار، وتكون لنا مزبلة التاريخ في الإنتظار، بمشيئة الواحد القهّار.

و لهذا نحب نتوجه للوخيان الأدمينات بدعوة، ، ونترجّاهم باش يرجعوا للحوار ويتعلّموا يقبلوا بإختلاف الأفكار. حبيت نقوللكم يا ناس، يزّي من التعصّب ومن الكره للأشخاص، راهي لا ورثة بيناتنا ولا سانية ولا بالاص، ولهذا يرحم والديكم ووالدينا، أخطاونا من البلادة وعفّوا علينا، خلّي الناس رايضة راهي مخنوقة، وخلّينا نسترجعو ثورتنا المسروقة، فيقوا يهديكم الهادي الستّار، وخلّيو الناس تقدّم آش عندها من أفكار، ولانا طالبين منكم تصفيق ولا تبندير ، ولا شكر ولا تقدير، حاولوا بركة باش تقيلونا من التجوبير، والتنسنيس على خصوصيّات الناس والتشهير، رانا موجودين في الرقعة هاذي بالسيف علينا وعليكم، وما عندنا من خيار غير باش تحملونا ونحملوكم. حتى حدّ ماهو مجبور باش يدخل لبروفايل متاع فلانة أو فلان، إذا هي أو هو ما يعجبوهش كأفكار أو كإنسان، وما يمنعك حدّ من التعبير، إذا كان تحاول تخلي بروحك عن مرتبة الحمير، وتناقش الموضوع بحكمة وتدبير، أو حتى تعمل صفحتك الخاصّة، وتكتب على علوم الفلك والصاروخ والغوّاصة، وتفيد الناس بما يستحق البحث والدراسة.. أما أنّك تجاوب بالسبّ المجاني وبالتشهير بأعراض الناس، فهذا عمل ما يعملو كان الوسواس الخناس، أوالحثالة البهناس إلّي ما يحبّ يمشي كان في الخنادق تحت الكيّاس.
أقول قولي هذا وأدعو الله لي ولكم بالهداية، وأنا أعلم وأنتم تعلمون أنّي أطول هذا القوم لسانا كما سبق وأن شهدتموه عيانا، وأنّي أقدرهم على 


الشتيمة إذا ما إستمرّ بنو بهيمة في عادتهم القديمة

كفاكم طحينا

ريتوه السيد هذا؟؟ لا هو إمبراطور، ولاهو ملك، ولاهو نبي ولاهو ولي 

نعمتكم... السيد هذا موظف ، يخدم فيك يا مواطن... شهريتو من 

تعبك ومن عرقك... ما عندو عليك حتى فضل وحتى مزية..  

ومايستاهل منك حتى عرفان بحتى جميل وحتى شكر على حتى    

واجب 

 

naM

نم يا ولدي نم،

أرقد وأخطاك من وجوه الهم،

نم يا ولدي نم،

هاذي بلاد كيف النم،

نم يا ولدي نم

نم يا ولدي نم،

أما خير ولا تهبل وتخرج عريان قلم؟

نم يا ولدي نم،

بعد إلّي العيشة ولاّت عدم،

نم يا ولدي نم

نم يا ولدي نم،

لواش فايق كان باش تعدّي حياتك زمم؟

نم يا ولدي نم،

نم وخلّي عندك خشم،

نم يا ولدي نم

عيد البطال

ساعات نتسائل علاش السياسة في بلادنا هي ميدان متسمّي على التجربيع والتكمبين والتجوبير 

بأنواعه من عهد برقيبة لعهد التغير إلي يومنا هذا ، في حين أنّها من المفروض تكون حاجة باهية تجمع 

الناس الشرفاء والوطنيّين وأصحاب العلم والخبرة إلّي يتلمّو في سبيل خدمة مصلحة البلاد إلّي هي 

مصلحة الناس الكلّ، كلّ واحد إنطلاقا من تصوّروا للمستقبل الأفضل وكلّ واحد في إطار المشروع إلّي 

يهدف لتحويله إلى واقع. لكن أين نحن من ذلك، أو كيما قال هاك الشيخ الغشّاش "أختاه، أين أنت 

منه؟"
مسكينة تونس إذا كان الناس إلّي تهتم بالسياسة باش تكون على مثل هذا المستوى التاعب إلي 

نشوفو فيه في المعارضة و بعض أعضاء المجلس التأسيسي و الحكومة ، وزاد فايسبوك بعد الثورة فضح 

برشة أشياء كانت غايبة عن الناس الغير مطّلعة عالسياسة من قريب كيفي أنا

و الله ساعات نقول هالمعارضين مساكن ناس موش لاقية كيفاش توصّل كلمتها وأكيد راهو عندهم في 

عوض البديل بدائل وفي عوض المشروع مشاريع، ياخي للأسف كي تشوف تلقى الناس الكلّها تقريبا 

تبقبق، لا رؤية واضحة لواقع البلاد ولا تصوّر واضح لمستقبلها، وفي المقابل الكثير الكثير من قلّة الأدب 

ومن الجهل بالقواعد الأساسيّة للتعايش مع البشر، وتجي تلوّج على الفرق بين هذا وذاك، بين اللي ي

عارض وإلّي يضرب في البندير، أكثر نالازم للنهضة و الحكومة تلقاها يا شكاير إيديولوجيا مزرّقينهالو في 

دماغو ونساو ما صبّولوش اللوجيسيال متاع النقد الذاتي، وإلاّ تلقاها مجرّد مصالح خاصّة وتدبير راس 

وتدوير الزير ولا يهمو في مصلحة بلاد و لا شعب .

بالطبيعة ما نسمحش لنفسي باش نعمّم على الناس الكلّ، بل بالعكس فمّا ناس كيما يقولوها يتحطّو 

على الجرح يبرى، وموجودين في مختلف الأطياف السياسيّة، أما برشة برشة ناس من المتواجدين 

والناشطين في ميدان البوليتيك نورمالمون تكون بلاصتهم صنّاع في محلاّت الطولة والدهينة.

زعمة تتفكّر ؟

زعمة تتفكّر ؟

تتفكّر جانفي فيفري مارس أفريل ... ونوفمبر ، ديسمبر إلي فاتوا  ؟ تتفكّر تصاور إلّي ماتوا ؟  تتفكّر إلّي في الصرد 

باتوا ؟ تتفكّر إلّي التبسيمة نساتو ؟ غريب بين خواتو ؟ عريان بين أندادو ؟ النار إستبناتو ؟   تتفكّر روحك  خيال ، ضبابة على راسك ، موش عارف خلاصك  ؟ البارح غدوة و غدوة ضلام ، مهموم كلاك النوم، نساتك الأحلام ؟    تتفكّر أيّام الغلبة ، ما لاقي وين تتخبى ، شاهي القبر والهجّة ، ما حكات عليك حتى لهجة ،  نساك السكّر في القهوة ، طوالت بيك الغربة ، وإنتي في بلادك ، عشّشِت في رواريك النّدْوه  ؟  الإدارة ما لقاتلك فضوى ، أمورك ما تمشي بلا رشوى ، التلافز تستبله فيك ، العصا مابين عينيك ، عايش و موش عايش ، ميت حي المستقبل مهوش ليك ؟ تتفكّر ؟

  تتفكّر صيفك كيف ولّى شتاء و الشمس تبكي عليك ، ما نجم حد يواسيك ، حاشم من المرايا ، مخبي راسك من إماليك ؟ تتفكّر الكلمة المخنوقة ، أيامك المشنوقة ؟  تتفكّر تصاور التأليه والحيوط الحزينة ؟  تتفكّر الخطوة الرزينة ؟  تتفكّر روحك تمشي من غير ما تقدم ، هاززتونس في دفينة ؟  تتفكّر ؟ 

إتفكِّر وهز راسك للسماء ، شوف السحاب يحيّي فينا ، بعد ما متنا رجعنا حيينا ، موزيكة المدينة تواسي فينا ! إتفكِّر و ما تنساش ، إتْنفِّس ، إتكلّم ، بالحرية و المحبة إترنّم ، تونس رجعتلك ، بوجهك الحقّاني قدِّم ، إنقم، إڨدِم، و إيجا سلّم .     

تتفكّر ؟ مالا إتعلِّم و في درابوك ما عادش تسلّم

وصف

البلاد تمر بوقت صعيب .. أهل حاجة فيها التخريب .. الأصلاح شي صعيب ... الدور الهام توا للعاقلين .. أي هذوكم الثوريين ... إلي باش يكونو للقضية حاملين ... و للأستقطاب الأديولوجي رافضين .... و للزوالي مؤازرين ... و للمظلوم منتصرين ... و للفقراء خير معاونين ... و لجرحى الثورة مساعدين .. و لشهدائها و أهدافها منتفضين ..

ياجماعة سيب عليكم مالتحزب و خليكم للوطن موالين

تعاسة

الوضع في هالبلاد شبه تعيس، لا يرضاه إلاّ الخسيس، بل أنّه لا 

 يرضي العلماني ولا الخوانجي ولا حتى البوليس، ذلك أنّ غياب   

 الحوار يجلب للجميع العار، فتنظر إلينا الأمم بإحتقار، وتحدث القطيعة 

  بين ذاك و هذا التيّار، ويعتكف أوّلهما في الجامع والثاني في البار، 

في حين  أن الجميع هاززهم نفس التيّار، متاع نفس الواد الهرهار، 

 و تكون لنا مزبلة التاريخ في الإنتظار، بمشيئة الواحد القهّار.

   

هاو قٌالو عملنا ثورة ؟

قالو ثورة قامت على الكرامة ، على الخبز، على الحريّات ، على حقوق الإنسان، على الديمقراطية، و قالو زادة اللي هي قامت ضد الإمبريالية، و من أجل تعريب التعليم و تطبيق الشريعة السّمحة خلاص..

لكن نساو ، أو تناساو عامل واضح في الحقيقة، خرجت على خاطرو برشة عباد للشارع تعيّط و تستنشق في اللاكريموجان ، و بنّكت على خاطرو جموع على الميّة في ساحة القصبة تطالب بمجلس تأسيسي مش دارية حتى معناه..

العامل هذا هو الكورة و عقلية الفيراج .. و اللي ظهرت هي المحرّك الأول و الأخير للسياسة التونسية..

 اللي صار في الثورة يشبه ياسر لحاجة ديمة تصير في الرياضة التونسية: لفترة محدودة، دامت شهر تقريباً، تلمّو التوانسة ورا هدف واحد و حسّو بالوطنية 11 مليون تونسي قلباً و قالباً، بالضبط كيف ما يصير في الكوب دافريك وقتلّي ليكيب ناسيونال تبدى تلعب و تختفي العصبيات بين مكشخة و كليبستية و إتواليست..

فترة وطنية عرضية، توصل لذروتها كي يفصع الزعبوع ولا كي نهزو الكوب دافريك..

تليها فترة يحس فيها التونسي بالفخر و الاعتزاز بإنو تونسي و كأنّي حاجة استثنائية.. ويبدا يبوستي على الفيسبوك في حاجات كيما "^^ (; Fier d'être tunisien" و يحط العلم على البروفيل.. ويبدا يبوس و يعنّق في العباد في الكياس..

الفترة هذي عادةً ما تدومش برشة ، جمعة كان خلات، و بعدها تطير النفحة و يرجع التونسي ينسى المنتخب الوطني و يتلهى في جمعيتو ..

توا الحاجة الوحيدة اللي تبدلت، هي إنو جماهير الفيراج ولات تسمي في روحها "

و بعد ما كان الصفاقسي يسب في الإيتواليست، صبح النهضاوي يسب في البدبيست..

و مللي كان ولد باب سويقة يعاير في ولد باب الجديد، ولا ولد المؤتمر يعاير في ولد التجديد..

  ، و إنو بعد الانتماء للجمعية طلعلنا الانتماء للأحزاب..

و بعد ما كان الصفاقسي يسب في الإيتواليست، صبح النهضاوي يسب في البدبيست..

و مللي كان ولد باب سويقة يعاير في ولد باب الجديد، ولا ولد المؤتمر يعاير في ولد التجديد..

  

الطحين و قلة الدين

كلامي مش بش يعجب برشة ناس ، و مش بش يعجبك انت ، يا اللي تقرى و تستنى بش تلقى حكاية في مخك مأكدة عندي. أما ، بكل صراحة و من طميم أعماق قلبي : يدكم .
السياسة في تونس واضحة ، من أيام المجاهد الأكبر (أكبر من شكون؟؟)، تتلخص في حكاية صغيرة


1 )  طحان قاعد على كرسي عندو برشة كلاب ، طحيحينات صغار ، يعضو أي واحد يقرب ، و بحذاه منيك ولا زوز ولا أكثر ، يقلو "والله كي تجي تشوف ، زيد أعطيني ناكل توة نقلك ، ولا تعرف كيفاش ، بكل وطنية أسمع كلامي" ... و بالطبيعة كلام المن... ما تكون كان حاجة معفطة. زيدهم حارتين مخززين ، واحلين في بصة ، الواحد فيهم توريه صبعك يطيح ميت. و هاذوما أفشل م المنيك.. ، مقتنعين اللي هوما أكبر فتقة صارت في علوم السياسة و المهفولوجيا ، لتوة مش فاهمين اللي عزرائيل خلاهم عايشين ، خاطر ماكلو الكبي و يحب يضحك شوية.
2) زيد عليهم الجماعة اللي يكرزو م الجيلات و م القراية ، اللي يصلي لربي و اللي يصلي لستالين، و كمشة زومبي ، تلامذة يتبعو ع العميتي أقوال المعلم الأكبر ، يحلفو اللي التخمام يا كافر يا تحريفي ، و اللي ما فماش حرية كان بالمسؤولية اللي فاهمينها كان هوما. كمل كعبات جران بالكوستوم و الكرافات ، ما حافظين م البلاد كان المصطبة متع المحاضرات.
3) و في وسطهم ، ملوحين هوني و غادي ، بزايد عباد قلوبها نظاف ، يفوتو ال 10 ملاين ، م البهيم للفتقة متع الذكاء ، ما يلمهم كان القلب الصافي ، و ما يفرقهم كان القلب الصافي. باسم البلاد ، و مصلحة البلاد يغلطو في بعضهم الصباح ، أما يقسمو الكابوسين لعشية و يطرشقو كعبات البيرة مع بعضهم و لا يصليو جماعة. هاذوما اللي لازم يكون بيدهم الحل و الربط متع البلاد ... كيفاش؟؟؟؟؟




ما نعرفش ، اسألو رواحكم

كلام جدود

يا سادة و يا مادة إلي عندو نبي يصلي عليه كيما قالو الجدود :

يحكيوا على بلاد عرعور .. مغير دستور . الحال فيها مهدود و الدخل 

محدود ..بلاد التنوع و الأختلاف موجود ..لكن الأحترام مفقود .. بلاد 

حبها إدمان .. و 

دائها النسيان .. و نخرها الطغيان ..و تبعثرت فيها كرامة الأنسان ..و 

جريح الثورة يهان ..و القناص شايخ بالأمن و الأمان .. و حالو حال 

مرجان ... و الشلة 

إلي آمنت بالبيان ( بيان السابع من نوفمبر) و التجمعي الجبان .. 

هاو رجع للميدان ..

مسرات تكاد تكون أسبوعية ... و تدعي المليونية .. و تريد فرض 

الأقلية على الأغلبية .. واحد قال برلمانية ..و 

لأخر يدعو للرئاسية .. و فيهم إلي قال 

الديموقراطية علة و خروج عالملة ..و هو ميعرفش أنو دخل و خرج 

في الحلة .. و فيهم إلي مشى لبعيد و قال يزينابلا تبلعيط .. فنحن 

ملوك التشعبيط .. 

فهي لا مدنية و لا ديموقراطية .. أنا شامم ريحة الماسونية .. و 

يلزمنا ندافعوا عالشرعية ...

توا يقول القايل هذا الكل عادي في أول سنة مالديموقراطية .. 

لكــــن وجب التنوية أنه فما أولوية .. و هي تحقيق أهداف الثورة 

المنسية ..من أجل

تلك اللحظة التاريخية .. و نحافظوا عالثورة إلي قالو عليها شبابية ..

و السلام عليكم و السلام عليا .