حليلها تونس

باش تولي وليدها في البوليتيك في تونس وكلمتك مسموعة ويوليو عندك أتباع وصحابة وتولي شخصية مأثرة في المجتمع الثنية طويلة وشاقة ولكنها تستحق التعب... باش تخدم البلاد بالطبيعة...

باش تبدى، من المستحسن يكون عندك ماضي نضالي معتبر وفيه إحتكاك ودراية بالجهاز القمعي... مثلا تكون مشجع ولد فيراج ...

تكون متشبع بالفكر السياسي ومضطلع في كل التوجهات السياسية والاديولوجية وموش البعض منها ... بمعنى آخر تتفرج في الجزيرة عالأقل مرتين في النهار وتكون عضو ناشط في بعض صفحات الفايسبوك القيمة .

لكن باش تنخرط فعلياً في المسيرة التوعوية والتثقيفية للمجتمع لازمك تملك وسائل معينة :

واب كام .

درابو تونس ،حتى كان تحصلت عليه في آخر إجتماع لجنة تنسيق ميسالش . المهم  لازم الواب كام تصورو وراك ، سنون ما عملنا شيء .

صفحة فايسبوك : أختارلها أتفه أسم تلقاه ... إسم متع بوكيمون مثلا .

مرايات شمس (الحقيقة مازلت ما نعرفش حكمتها ).

كي تقعد قدام الكام وتبدى باش تلقي خطابك تذكر حاجتين .

الحاجة الأولى : إجبد عبد معروف واللى حتى رأي فيه إختلاف، ومرمد والديه بالسبان ولفقلو شبعة تهم باش يجي شكون يرد عليك وهكاكة تلقا موضوع للفيديو متاعك الجاي بش ترد عليه بدورك وهكذا  ...   

الحاجة الثانية والأهم : مهما كنت بهيم ، كي تبدى وراء كاميرا لازم باش تلقى شكون أبهم منك يساند فيك ويصفقلك وهاذي حقيقة عامة وعصر زعبع والقذافي يشهدو بهذا .

شكراً عالمتابعة والإهتمام ودمت ذخرا لهذا الوطن. 

http://3al-7it.blogspot.com/2011_03_01_archive.html

لأين أنت منه

تنبيه : هاذا المقال يحتوي عديد الألفاض اللتي يعتبرها العامة لا أخلاقية ومشينة ومنافية للهوية العربية الاسلامية ولذا كان عمرك أقل من 16 والى انتي على وضوء والى عندك تشنج الهويات وتحس روحك تنجم تعمل عربدة الضوضاء؛ الرجاء نقل الفأرة 45 درجة الى اليمين والنقر على الزر الأحمر واللذي يسمى " بيناتنا فلسة".


ومن غير تمييع قضايا وتطويل حكايات ، آنا ليوم قاعد في ركن تحت البيبليوتاك العائلي والكتب مفرطين بين يديا نخمم في ملكوت الغيب ورب الفلك. ومنتابتني حيرة فلسفية وعقلي سارح في الزناقي الميتافيزيقية الملتوية. نخمم في الوضع القائم في البلاد وفي المنطقة الجغرافية في بلاد العربان.
نخمم في قضية الهوية وعلاقة الدين بالدولة ومفهوم المواطنة والأنغلاق والديمقراطية والمادية الجدلية والفكر الوطني والفكر القومي ومن ينادون بالخلافة .. والخلافة الراشدة التي أبعد ما تكون عن الرشد والتاريخ الإسلامي البدائي وفظاعات الأصولية والقرآنيون والخوارج وقضايا الحريات الفردية والخمار والخمر والنقاب واللحية والشلاكة بو صبع والسترينغ وشعر الضبوط وشيوخ النيلسات ونكاح الغلمان ونكاح الرضع وارضاع الكبير وعقلية الرعية والرضوخ وتطيح السروال وبيع الذمم والطحين واللحس والنزعة الذكورية للمجتمع وأربعة نساء والنيك ليل وصباح وبوس الواوا وحوريات الجنة الستة طزازن والبورنو والقحاب للي بكوارتهم والأمهات العازبات والتبني وشيخ الطريقة وحزب المدبية والرئيس الغلام...
فجعتاً زمر التاليفون لينبئ برسالة خطية قصيرة ، تبين إنه ميساج اطلبني ... قربت التاليفون باش نطلب ، ياخي جات عيني في الماركة : "سامسونغ" ...
من أنتم يا مازمبي؟ أين أنتم مللي نخمم فيه ؟؟

نا هكاكة في إرتباك ومخي عمل فريز تايم وقعدو سرصوط تصاور يهبطو عليا :

كراهب بورش ، طيارات ، دوايات جلدة ، عقاقر ضد الكلب ، حاملات طائرات ، غواصات نووية، أفلام ، لعب توب ، شاشة ثلاثية الأبعاد ، بافلوات !

يا مازمبي من أنتم ؟؟ وشنوا راي البلدان اللي صنعكم في علاقة ألدين بالدولة وبالخلافة وبالنقاب واللحية ؟؟

والتصاور مزالو يهبطو: ذهب، دولارات، مفاعلات نووية، راجمات صواريخ، رحلات جوية آهلة، ماء فوق القمرة، مخبر في المريخ، سوند في طرف الدنيا، علم الجينات، علم الذرة...

من أنتم يا مازمبي ؟ آش قول علمائكم وأمم نشأتكم وتمويلكم في مسألة ارضاع الكبير وبول البعير وفيلم بيرسيبوليس وشطر البزولة اليمين متع نادية ؟

بحيث ، شنوا ذنب الزبب متاعي آنا كي توجدت في مجتمع متخلف وغارق في الخرافات والماورائيات والأفيون ؟

شنوا ذنب مازمبي آنا كي نخمم باش في جامعتي يعملولنا محاضرة على الإعلامية الكمومية informatique quantique ، يجي ولد بلادي اللي عايش في القرن الأول بعد إكتشاف النار ويحب يفصل الذكورة على الإناثي ؟ ونضطر باش ندخل آنا في معركة فكرية اديولوجية من غير معنى وننسى المحاضر وننسى اللي آنا باش نخرج بطال وننسى اللي ولاد حومتي موش لاقين حق خبزة وننسى اللي عنا ناس ما عندهمش ماء في القرن الواحد والعشرين وننسى اللي مزالت فما ناس تموت بأمراض منقرضة في ها البلاد هاذي !

يا مازمبي ! فايقين بزبور أم الخرى اللي عايشين فيه ؟؟ فايقين اللي فما بلدان في قالب غلطة واحد يكح والى يعطس والى يحك ترمتو يبعث قنبلة والى جرثومة تفسخ العباد والبلاد والأوهام والماورائيات والبهامة اللي عايشين فيها الكل ؟؟

فايقين اللي طموحكم صفر ؟ واللي مستقبلكم اللي تحلمو بيه باش يكون انيك ببرشة من حاضركم ؟؟

يا مازمبي ، أين أنتم منهم ؟؟ ما تحسوش اللي نحنا ضحكة العالم القرودة الجرذان ، غبار الأفراد ، الخارجين عن التاريخ والعقل والفكر !

وأنت يللي لاعب فيها تفهملها يا مازمبي ! تحرك حل فمك ، حرك ترمتك وأنت كي الجلدة الميتة وفرحان بلوغة " الأغلبية الصامتة" والكلام الفارغ متع الرومنطيقية !

تحرك عصبة وتمرد على الوضع الخراوي ألي عايشين فيه مللي تخلقنا ! 

أبى جهل

اخرج  أبى جهل مصباحه السحري  إاثر الحيرة الشديدة التى انتابته اثناء متابعته للوضع التونسي  و بعد ترديد تلك الكلمات السحرية خرج عليه الجني يتثائب من المصباح فسأله أبى جهل : 

أصدقني القول يا جني  "ماذا يحدث في تونس؟"

الجني: "هعقفغ منمناتااغلىننيءاغلت "

أبى جهل : آه ؟؟؟؟؟؟؟؟؟

الجني : " ننتؤلخحهعىلاثهبغعرملانخحه

أبى جهل : ماذا تقول ؛ لم افهم شيئا؟؟؟؟؟"

الجني: هعهعهعهعهعهعهعهعهع

أبى جهل : لعنتك أمك ياجني لما تضحك ؟

الجني "في الواقع الوضع التونسي لا يمكن تفسيره بلغة البشر؛ يجب عليك ان تتعلم لغة الجن" .

سلعة ساعة و بنية الترفيه عالنفس و تبادل الثقافات يدقٌني ربي و نمشي نعمل دورة في صفحات الفيسبوك متاع أشقائنا العرب نتفقـد حالة التخلف 


السائد والخرافات والجاهلية متاع الألفية الثانية إلّي وصلنالها، وفي الكثير من الأحيان تصادفني مواضيع للنقاش يجتمعو عليها الأشقاء، من كل حدب 


وصوب ويبدى ريقهم سايل على خاطر تصويرة و نلقاهم يسبحوا و يكبوا و يهلهلوا ، الأغلب أنها تكون "مبعولة" بالفوتوشوب، متاع تفاحة مكتوب عليها 


"صلي عالنبي تربح"، أو خليّـة متاع نحل مكتوب عليها "انزاد النبي وفرحنا بيه صلى الله عليه"، أو ثعلب ميّت وفي يدّو جربوع مازال يتنفس في جيبو 


سطوش فيه حرز الحصن الحصين الحاسيلو أكيد راكم شفتو أشياء من النوع هذا وإلاّ بعثوهالكم


أنا بصراحة تامة نيتي ماهيش باش نستفز مشاعر الإيمان اللي تحيرت على بعض التوانسة من بعد الثورة

أما نحب نفهم حاجة، خاصة بالنسبة للناس اللي عندها شوية عقل وتحب تحكي باللوجيك، توة الدين مازال في حاجة للخزعبلات من النوع هذا باش 


الناس تؤمن بيه؟ توة ربي سبحانو بعد ما بعث الأنبياء والرسل باش تهدي الناس على مر العصور مازال في حاجة باش ساعة ساعة يبعث كعبة دلاع 




مكتوب عليها بسم الله الرحمان الرحيم وإلاّ شجرة معوجة باش الناس تمشي تصلّي وترجع للطريق المستقيم؟

بجاه ربي فهموني إمّالا كيف هي الحكاية هكة، كعبة السفنارية هاذي أشكون إلّي خلقها ولشكون بعثها وآش يقصد بيها؟؟؟ ولاّ زعمة الأخرين بكلهم معجزات كان هاذي جات صدفة؟؟

معمر القدافي

الأخ العقيد معمر القدافي قائد ثورة الفاتح من سبتمبر العظيم و رئيس 

الجماهيرية الإشتراكية العظمى الليبية القديمة قرر باش يعمل شوية 

تبشير ديني 

في بلاد الطليان و قام بجمع 200 فتاة من خيرة شابات إيطاليا باش 

يدعوهن للطريق السوي و الدين الحق، بعض المراقبيين قالو أنو نزع 

عنهن ثياب الكفر، عطاوه قبلة الإسلام و عطاهم عمود الدين شوية 

صور تعبر أكثر عن تمسك القدافي بدينو و رغبتو في نشرو

حكايات و خرافات

كان يا مكان
في حديث العصر والزمان
قرية افتراضية دايرا بيها البحار ومليانة بالأنهار والوديان
الشمس فيها ديمة زارقة والعصافير ديمة تزقزق

يعيشوا فيها الفيسبوكيين بسلام وأمان
ولم يذكر التاريخ حدوث لا جرم ولا عدوان

الأدمينات  جايين من جميع الأقطاب ومن مختلف الاتجاهات
فيهم من اليمين ومن هو من اليسار
ومن من أهل الدين و الفضل و من أهل النبيذ والخمر
ساعة ساعة تلحم بيناتهم وتاكل بعضها
لكن كلهم حبيبات والأمور فيسع ترجع إلى مجراها

و في يوم من الأيام ركب عالثورة
أحمق الخلق شديد الغباء
طاغية الزمن قليل الحياء

كثرة الأعتصامات و المسيرات 
فكانت القطرة اتي أفاضت كأس الحياة

تغششو الأدمينات و إستنكرو و تجمعو قدام مدونة واحد منهم

كانك من البطالة  وعلى لسان   قالو

لولاد معادش ينفع فيها كان الحرقة
سيبوني نتصرف في فلوكة وفجاري انشالله نقصدو ربي للطليان

قريرة الفيلسوف قال 

الهجرة يا معز هي سنّة كونية حتى الحيوانات إذا رأت نفسها في الخوف أو ضغط الظروف فإنها تهاجر لاستمرار 

رستم الشجاع قال

 
هذي أرض أجدادي و احبابي
مانيش متحرك من القرية متاعي سوف أدافع عنها بكل استماتة وانا على يقين بالنصر

مجدي ناجي الشاعر قال

 يقول أبو القاسم الشابي
إذَا مَا طَمَحْـتُ إلِـى غَـايَةٍ رَكِبْتُ الْمُنَى وَنَسِيتُ الحَذَر

وَلَمْ أَتَجَنَّبْ وُعُـورَ الشِّعَـابِ وَلا كُبَّـةَ اللَّهَـبِ المُسْتَعِـر

وَمَنْ لا يُحِبّ صُعُودَ الجِبَـالِ يَعِشْ أَبَدَ الدَّهْرِ بَيْنَ الحُفَـر

توفيق الغضبان المغشاش قال 

أنا أكره الحفر

أنا أكره التفكير
أنا أكره الحلول
أنا أكره اليمين
أنا أكره اليسار
أنا أكره النهضة  

                                                 حسام الدين الخوانجي قال 

أنا لا أوافقكم
فقد تبين أن قريتنا تعيش أجواء من الفرح العارم والتفاؤل بمستقبل مشرق ومزدهر في ظل القيادة الرائدة والحكيمة لحكومة الجبالي 

                                                     أبو هارون الرجل الديني قال 

سوف اطلب من الله عز وجل أن ينصرنا على العدوان و على القوم الظالمين
اللهم بسطوة جبروت قهرك , وبسرعة اغاثة نصرك , وبغيرتك لانتهاك حرماتك , وبحمايتك لمن احتمى بآياتك نسالك يا الله يا الله يا الله يا سميع يا قريب يا مجيب يا سريع يا منتقم يا جبار ..

                                              كريم اللا ديني قال

يزيتشي بلا ريق ... كان احنا في الوضع هذا اليوم راهو الكلو من ثقافة الإستبداد المستمدة مالدين متاعك و شيوخ الرضاعة 

بما أن الحكايات في عالم الخرافات ما تنتهي كان بالشيخات

فقد أسرع المندس لإيجاد حل

يؤدي إلى الشعور باللذة والفرح والمرح

فكلفت المدعو عبد الرحمان بن محمد بن سوقٌير لقنص كل من تبقى من حثالة فرنسا و بقايا التجمع 

فما كان من  سكان القرية إلا أن عادو لصفحاتهم فريحين مسرورين  

فخر و فخرة

بربي عندي سؤال حيرني و أرّق ليلي كيما يقولو جماعة لغة الضاد

السؤال :هو علاش كي يبدى الواحد يحكي بالعربية الفصحى يقول "بكلّ فخر" وكي يبدى يحكي بلوغتنا الدارجة يقول "من غير فخرة"؟؟؟؟؟؟؟؟؟

زعمة لواش، قلت أنا، الفخر ميسالش والفخرة لا؟
زعمة الفخر باهي والفخرة دونيّة؟
ولاّ خاطرها الفخرة أنثى والفخر ذكر، نولّـيو نبجّـلو الفخر ونخلّيو الفخرة في الدار للقعدات والمناسبات؟
ولاّ زعمة خاطراللغة العربية الفصحى هي بطبيعتها لغة متاع ضربان اللوغة، يعني ما نستعملوها كان للتفشليم والتبلعيط، وهاذاكا علاش إنّـجّمو نبداو نفخرو بالكذب، حتّى كان ما عندنا شيء يستاهل الفخر؟
أمّـا اللغة الدّارجة، وبما أنّنا نستعملوها مابيناتنا، كي ما يبداش معانا برّاني، عاد ولّينا نحّينا منها حكاية التفوخير هذا مادامنا بكلّنا نعرفو مليح اللّي عندنا، وخاصة اللّي ما عندناش، والّي في الواقع ما فمّا شيء يستاهل باش نتفوخرو بيه على بعضنا ولا على النّاس، ياخي ولّـينا قلنا الفخرة موش باهية، و بالشوية بالشوية حتّى لين ولاّت عيب، و ولّى الواحد يحشم على روحو باش يتفوخر

مـجـتـمـع الـمـعـرفــة

أكيد أنّكم سمعتو، ولو مرّة وحدة، بكلمة مجتمع المعرفة وبإقتصاد المعرفة أو الإقتصاد اللاّمادّي، والأكيد راهو فمّا شكون قاللكم أنّ المفاهيم هاذي هي مفتاح التقدّم و"المص-تقبل" والسلاح الجديد اللّي البلدان باش تستعملو في "معركة" التنمية، ولو أنا واحد مالنّاس عمري ما حضرت على عركة بسبب التنمية بالرّغم أنّي نسكن في حومة عربي والعرك اللّي نحضر عليه في الأغلبيّة يا على الشراب يا على الفلوس يا على الأناثي

المفيد باش ما نطوّلش عليكم حبّيت اليوم نحكيلكم على المفاهيم الجديدة هاذي باش ما تبداوش ضايعين فيها كيف تسمعو الحكايات هاذي في المستقبل ونبداو بكلّنا نحكيو نفس اللغة

باختصار شديد، مجتمع المعرفة هذا هو المجتمع اللّي المعرفة والمعلومات عندها فيه قيمة كبيرة، وأكبر حتّى من المكاسب والممتلكات الماديّة كيما الديار والكراهب والفلوس والبترول ولحم العلّوش

يحب يقول اللّي باش يكسب المعرفة، مهما كان نوعها، هاذاكا هو اللّي باش يسلّكها، أمّا اللّي ما يوصلش للمعرفة وللمعلومات، هاذاكا سعدو مكبوب وأيّامو تهردت، على خاطرو باش يطيح في الهوّة الرقميّة، وهي عبارة على فوسي أو هفهوف كبير باش يلوّحو فيه الشعوب المتخلّفة الكلّ ويرتاحو من مناظرهم المقلّبة إلى قيام السّاعة

برشة ناس تظن أن حكاية مجتمع المعرفة هي حكاية جديدة وما ظهرت كان مع الأنترنات والتكنولوجيا العصريّة، لكن الناس المختصّين كيفي أنا يعرفو أنّها بلادنا هي من أوّل البلدان اللّي عرفت مجتمع المعرفة، وماهيش صدفة كيف الأمم المتّحدة إختارتنا باش نستقبلو القمّة العالميّة لمجتمع المعلومات في نوفمبر اللّي تعدّى

نحنا في تونس فهمنا قبل الأمريكان والألمان والعالم المتقدّم الكلّ أنّو الإنسان بلاش معرفة ما يسوى شيء، وتلقانا ديما كيف باش نقضيو قضية نلوّجو على معرفة، واللّي ما عندوش معرفة يلوّج على معرفة معارفو. أمّا اللّي ما عندوش المعارف، وحدو وحدو يفهم روحو ويشدّ دارو، على خاطرو واعي اللّي هو يعيش في مجتمع المعرفة، أو بالأحرى مجتمع اللّي عندو المعرفة، وبالتالي زايد باش يحاول يستعمل معانا وسائل أخرى

المعرفة تعاون الإنسان برشة وتسهّلّو حياتو وتقضيلو شؤونو خير من أيّ طريقة أخرى، وهاذاكا علاش أنا نشجّع كل إنسان باش ينخرط في مجتمع المعرفة ويسعى بكل جهدو باش يكون عندو أزيد ما يمكن من المعارف

فمّا بعض الناس من الرّجعيين، الله يهديهم، جايين ضدّ حكاية المعرفة هاذي، ويسمّيو فيها في أسامي خايبة برشة كيما المحسوبيّة والزبونيّة والوساطة والمحاباة والتحيّز والفساد، بالشماتة باش يكرّهو فيها النّاس ويظهّروها حاجة خايبة للعامّة البسطاء، في حين أنّها من عوامل التقدّم والحضارة، وهاني باش نبيّنلكم علاش

توّة نحنا في بلادنا قدّاش من رقبة؟ عشرة ملاين كان طارت؟ يعني تقريب بكلّنا نعرفو بعضنا، وكيما يقولو، كان جينا في الصين رانا بكلّنا نقعدو فرد قهوة،

يعني هذا أنّو لو كان كلّ واحد منّا يقضي لمعارفو، في نهاية المطاف النّاس الكلّ باش تسلّك أمورها وكلّ واحد ما يروّح كان فرحان

يبقى لهنا دور المواطن اللّي لازم يتحمّل مسؤوليّتو ويسعى باش ربّي يباركلو ويلقى المعرفة اللّي باش يسلّكهالو ويقضيلو أمورو، موش يبدى قاعد ويحبّ المعرفة يجيه ليديه، هاذاكا يا حسرة كيف كانت الشيوعيّة عاملة مسدّ قبل ما يفيقو بيها اللّي هي نظام فاشل

تبقى أخيرا حكاية إقتصاد المعرفة، واللّي عندها معنى مختلف في بلادنا على بلدان العالم الخارجي، على خاطر كيما قلتلكم ، نحنا اكتشفنا الحكايات هاذي قبلهم

إقتصاد المعرفة عندنا نحنا يلزم نفهموه على معنى الإقتصاد في المعرفة، يعني كيما الإقتصاد في الماء وفي الكهرباء وفي المازوط، والسبب واضح وبسيط وهو اللّي نحنا إكتشفنا من سنين أنّو "كلمة لا ما تجيب البلاء" وأنّو اللّي يعبّي راسو بالعلم والمعرفة ما يحصّل كان وجيعة الرّاس والميزيريا الكلبة، وأنّو خيارو بنادم لا يشوف لا يعرف ولا يوجع قلبو، على خاطرو على قدّ ما يزيد يفهم ويعرف، على قد ما يزيد تعاسة وهم على قلبو حاشاكم

هاذاكا علاش الطبّ الحديث يشجّعكم على البهامة والجهل والإقتصاد في المعرفة، تعيشو في خير وما تقلّقوش غيركم، وأنا هاني نصحتكم وإنتوما تعرفو ما يصلح بيكم

تونسي حرّ

عجايب و غرايب..

قدّاش يتبدّل الإنسان كيف يبدى على بلادو غايب..

كلّ شيء يفكّرو في ناسو..

و أقلّ حكاية على الخضراء تبربشلو إحساسو..

في الغربة كل شيء جاي من بلادك يحلالك..

حتّى اللّي عمرو كي تبدا فيها، ما جاء على بالك..

تونس 7 تولّي أحسن قناة..

و القهاوي التونسيّة من أمثالنا إستغنات..

يا تونس ما فهمتش شنوّه هالسّر الكلّ..

اللّي يحسّ بيه كلّ تونسي حرّ..

يا بلادي يا ترابي يا أهلي يا أصحابي..

أيامّات و نرجعلكم يا أحبابي..

غربة

مانيش مستانس نشكي مل غربة
بالرّغم من بعدي عن أهلي و الصّحبة
أما اليوم فاض الكاس
و طفطف الهمّ على قلبي يا ناس

اليوم و أنا ماشي في اللّيل سارح في ملك ربّي
شمّيت ريحة مسك اللّيل، تفكّرت الخضراء و حسّيت بوجيعة في قلبي
و في لحظة دخلت الذكريات من غير ما تدقّ على بابي
و بدات تسرح و تتغلغل في عقلي و تفكّرني بأحبابي

هي ذكريات على قدّ ماهي حلوّة على قدّ ماهي توجع
خاطر مادامك متغرّب صعيب أنّها ترجع

متوحّش سيدي بو سعيد و منارتها
مشموم الفلّ، القهوة العربي، سيدي الشّبعان و قعدتها
متوحّش سهريّة مع بابا و أمّي
نحكي معاهم فيها و ننسى همّي
ولاّ تبنيكة في قهوة إيناس
فين اللّمة و الضّحكة الحلوّة مع عزّ النّاس

في كلمة متوحّش بلادي
وين أهلي و أصحابي و أندادي
أما زايد الحديث توّة خاطر الصّبر باهي
و يجي يوم و نروّحلك يا تونس و نرجع زاهي 

العار

مسيرة العار لتونس ؟؟؟

ما هذه المهازل ؟؟؟؟

1. و الله العظيم الشي إلي وجعني هو درابو تونس ؟؟ مسكينــــــــــــــــــــــــ تونس ــــــــــــــــــــة

تفاهات

في وقت من الأوقات.. معلوم الاذاعة والتّلفزة كانت له مبرّرات.
أمّا اليوم فقد دخلت على الاذاعة والتّلفزة تغييرات جذرية.. وصارت لها مداخيل جمّة بفضل الومضات الاشهارية.
فلماذا لا تلغي الدولة هذا المعلوم من قائمة مقابيضها الجبائية.. ونحن نعدها، في المقابل بأن نكف عن «الاستمتاع» ببرامج مؤسّساتها السّمعية والمرئية.

أما علاش

بسم الله الرحيم الرحمان و سبحان الذي خلق الأرض والبنيان وقسمها إلى دول وبلدان ووزع عليها عباده من بني الإنسان، فجعل منها الدول المتقدمة والدول الزبالة، وخلق الشعوب الراقية فجعلها في أحسن حالة، وخلق الشعوب الفقيرة المسالة، فجعل كروشها فارغة و وجوهها مذبالة، وجعل من بينهم جميعا الصالحين والحثالة.
أما بعد يا جماعة يا مرحومي الوالدين نحب نحكيلكم على مسألة حيرت بالي وخلاتني ما نعرفش كيفاش نوصف حالي. توة أنا كنت قانع باللي ربّي كتبهولي ومن قبل ما نتولد سطّرهولي. ومن بين الأشياء اللي إقتنعت بيها بطول المدّة هي أنو مقدّر عليّ باش نعيش في البلاد هاذي اللي جاية تحت إيطاليا وفوق إفريقيا


أما  علاش البترول  وصل لحدود ليبيا   و شاح ؟ و علاش الغاز وصل لحدود الجزائر و تقطع؟ علاش الأتحاد الأوروبي  وصل لسيسيليا و قال هنا نوقف  منزيدش خطوة ؟ علاش الأسلام متاعنا ما يعجبش المسلمين و العربي متاعنا ما يعجبش العرب  و السوري متاعنا ما يعجبش الفرنسيس ؟؟؟

أما  مكتوب رب العالمين باش نحبّها ونقبلها بعيوبها وكل ما فيها، بما أنها هي بلادي وما عنديش ما نغيّر في حكم الله. هي صحيح ماهيش السويد وإلاّ سويسرا، والعيوب متاعها ظاهرة أكثر من محاسنها، أما تعدّي روحها، ماهيش دونية، وكيما يقولوها: شدّ مشومك لا يجيك ما أشوم منـّو، والطماع يبات ساري.

كلمة حق

هؤلاء لم يسرقوا بنوكا...و لم يخلعوا أبوابا...و لم ينتزعوا حقّا من أحد...رغم ذلك قالوا عنهم "متطرّفون"...لأنهم لبسوا ما يريدون و ظهروا كما يحبّون..قالوا عنهم "متطرّفون"..أيّ قوانين التي تسمّي السّلم حربا و حرب سلمًا و الأبيض أسودا و الأسود أبيضا؟ ظلمُوا طيلة أعوام فمن حقّهم اليوم أن نشدّ على أيديهم و لا نريهم منّا إلاّ خيرا.

http://kahaw.blogspot.com/2008_09_01_archive.html

http://samsoum-us.blogspot.com/2007_01_01_archive.html

ديديكاس :

هاذي حكايتو هوّ ....حالم و عاشق حزين.....لا عندو لا حول و لا قوّة......يضحك و الدّمعة في العين.......

هاذي حكايتها هي......إلّي سنين شغلت البال ......قاللها تمنّيتك ليّا... دارت و الدمع سال

هاذي حكاية ممنوعة....في قلوبهم رسمت جراح.....خلاّها محبوسة في ضلوعه.....و عيّط كي طير بلا جناح.......

هاذي حكاية اثنين....حبّو و خرجو عالحدّ......و بربّي الّي يقرا ها الكلمتين......يسكت و ما يقول لحدّ....

السلفية

السلام والإحترام للسادة والسيّدات الفيسبوكيين و الفيسبوكيات أمّا بعد هذه التحيّة، واللغة المضروبة الخشبيّة، ننتقل بيكم إلى صلب الموضوع، 
يا أسيادي يا أولاد بلادي إكتشفت اللي أنا إنسان سلفي وما في باليش بروحي، إي نعم يبارك فيك والحكاية هاذي ماهيش جديدة، عندها مدّة وأنا غارق فيها من غير وعي، والحمد والشكر لله أنّ الأحداث الأخيرة إلي صارت في بلادنا في جرة السلفية ( من سجنان إلى الدمخام و الأرأسان متاع أمس) خلاّني نفيق بخطورة وضعي ونقرر باش نتوب ونستقيم ونعرف خطورة السلفيّة هاذي وفين تنجم توصل بصاحبها والعياذ بالله

توّة تقولو إنتوما كيفاش هالشباب هاذا ماركة نهضتي يا نهضتي و حرية عدالة و تنمية جهوية و إسلام معتدل و حريات ، جاي يكذب علينا في هالليل ؟؟؟؟؟

أما نحبّ نطمّنكم ومن غير ما نوصلو لكلام العيب، أنّها السلفيّة متاعي أنا، واللّي لقيتها زادة عند عدد كبــــــــــــــــــــــــــــــــــــــــــير ياسر مالتوانسة، هي سلفية من نوع جديد، وماهيش كيف السلفية متاع جماعة سجنان و السلفي متاع الدماغ أمس، هاذيكا اللّي يقولولها السلفيّة الجهاديّة، متاع الإرهاب والسلاح و المقاومة ، لااا يا بابا، خاطي خوك

أنا السلفيّة متاعي إسمها السلفيّة على-قدر-الجهيّديـّة، يعني سلفيّـة متاع هاذاكة حدّ الجهيّد

تقول إنتي توّة آشنوّة هالتيّار الجديد متاع السلفيّة اللّي نتبّع فيها أنا؟ يا سيدي يا مرحوم الوالدين السلفيّة هاذي جاية من السّلف متاع سلّف يسلّف تسليفا، يعني بالعربي سلف الفلوس. والسلفيّة هاذي تشدني جمعتين كل شهر، من نهارة اللّي نصرف فيه آخر فرنك( ريال) من شهريّـتي المحترمة، تلقاني خوك نضبضب منين باش نتسلّـف

حاسيلو هالسلفيّة هاذي بيعة مقطّعة وماهيش آفار بصراحة وأنا نعلن التوبة قدّامكم اللّيلة، راجيا الله لي ولكم بالمغفرة والسلام عليكم ورحمة الله وبركاته

إلى الجهـــــــــــــــــــــــــــــــــــــــــــاد

الحرقة

اليوم عرفت معلومة جديدة والفضل في هذا يرجع لراجل كبير يعرف تاريخ الدنيا الكلّ، وحبيت نقتسمها معاكم على هالمدوّنة المتواضعة فمّاش ما تراولي بالمعروف 
اليوم إكتشفت منين جات كلمة الحرقة -من حرق يحرق فهو حارق أو حرّاق- وهي كلمة تعني في لهجتنا التونسية العزيزة علينا الإنسان اللي يهاجر بدون رجعة و بطريقة غير شرعية للخارج، وعادة ما تتم العملية هاذي في قوارب أو فلايك صغيرة عبر البحر الأبيض المتوسط وتكون الوجهة هي السواحل الأوروبية. ولكن علاش كلمة يحرق بالذات؟ اليوم إكتشفت أن أصل الكلمة هاذي أقدم ملّي نتصورو، حيث ترجع الحكاية إلى القرن الأول للهجرة-حوالي العام 700 ميلادي- وبالتحديد إلى فتح الأندلس من طرف طارق ابن زياد، وقتلّي أمر قائد الجيش الإسلامي بحرق السفن اللّي جاء فيها للسواحل الأوروبية وقال مقولتو الشهيرة "البحر من وراءكم والعدوّ أمامكم، وليس لكم والله غير الصدق والصبر". حسب الراجل الكبير اللّي يعرف كلّ شيء، حرقان السفن متاع طارق ابن زياد كان إشارة الإنطلاق الأولى للشيء اللّي ولاّ اليوم عمل شبه يومي للشباب في الضفة الفقيرة للمتوسط، بما أن الحرقان منذ المرة الأولى كان المعنى منّو هو الذهاب بلا رجوع وما يبقى للحارق كان خيار واحد وهو إكمال الرحلة للآخر وبلوغ الهدف أو الموت اللي لا مفرّ منه، يعني كيما يقولو أولاد الحومة: يا نعيشو عيشة فلّ، يا نموتو الناس الكلّ، وهو بشكل أو بآخر نفس المنطق اللّي كان يتّبع فيه البطل التاريخي طارق ابن زياد، ونذكّركم هنا أنّو طارق ابن زياد كان قد تمّ عزله من المهام متاع قيادة الجيش من طرف موسى ابن نصير اللّي كان عرفو يعني الشاف أو المدير متاعو، واللي كان زادة السبب في دخولو لللإسلام. عزلو يعني طيّرو من قيادة الجيش وألحقه بالفريقو، لأنّو كان يعتبرو متهوّر ويخاطر ياسر بحياتو وحياة الجنود اللّي كانو معاه، يعني إنسان مقربع شويّة ويتخمّر مع الفتوحات كيما فيراج لمكشخة، يولّي كاميكاز ما علبالوش. أهوكا يحرز في الآخر تدخّل الخليفة الوليد ابن عبد الملك باش صالح ما بين سي طارق وسي موسى وباش رجّع سي طارق إلى سابق نشاطو ورجع ينحّي في جدّ والدين الكفّار

مفيد الهدرة: طارق كان هو أول حارق، والتاريخ يتذكر الحارقين، ولهذا ما تستغربوش كان الحرّاقة متاع اليوم يولّيو أبطال وطنيين عام 3170 وتلقاو كتب تحكي على سيرتهم الذاتية بالواحد بالواحد، وما تحقروش الرجال راهو الحقار يموت ذليل

وين الهربة وين

ما نخبيش عليكم يا جماعة أنّي ما نحبّش ياسر الفرنسيس من صغري . علاش تقول إنتي؟ ماهو من عمايلهم. لايزّي جاو إستعمرونا قال شنوّة باش يردّونا بلاد متحضّرة ويخرّجونا من التخلّف، وزيد من بعد، دوب ما قلنالهم أخرجو علينا، هزّو رواحهم ومشاو من قبل ما يكمّلو يعلّمونا التحضّر وقبل ما يخرّجونا من التخلّف. عاد شبيه كان قلنالهم نحبّو على الإستقلال؟ ياخويا ما نفدلكوش؟ ماهو على الأقلّ يعطيونا مدّة نجرّبو فيها الإستقلال، وكان ما ساعدناش يرجعولنا وما صار شيء، نقعدو وخيّان، علاش النبزيّات؟ باهي هكّا كيف قعدنا وحدنا في البلاد؟ آش عملنا وجاء مليح؟ العباد من القلق ولاّت تشق في البحر على الفلايك خالطة في جرّة المستعمر ولد العكري، يا ولدي صلّي عالنّبي ، راك متاعنا،راك ولد بلاد , راك ولد تونس , راك محسوب خونا، تجينا ونجيوك، تحبّنا ونحبّوك.تزورنا و نزورك... وهوما الجماعة قالّك "سي فيني أونترو نو"، أمسح مات عالقوفرات، يوفا الحبّ، خلّينا بالقدر من بعيد لبعيد،

الخبز

من منّا لا يعرف خبز غنّاي، ذلك الخبز الذي يجمع بين الطّعام الأصيل وفنّ الغناء، من منّا لا يشتاق لرغيف ساخن مازال كيف خرج من الطّاجين، رمز الأصالة والحداثة والعروبة والإسلام؟ لماذا إذن تركنا هذا الطّعام الشّريف وإتّجهنا نحو أشكال دخيلة من الخبز القادم إلينا من الغرب الكافر؟ لماذا أصبحنا نعشق البيتزا، تلك الوجبة الماسونيّة المتصهينة ونترك خبزنا الأصيل الذي ساهم في تقدّمنا ورقيّنا خلال عصورنا الذهبيّة؟

وبهذه المناسبة نهديلكم هذه الأبيات الشعرية المسروقة من مدون جاهلي

خبزك ماسوني جرّالي دمعة من عيوني،

ورغيفك صهيوني معجون بيدّ الشّاروني

خبزك ماسوني يا حليلي خبزك ماسوني...

نبكي على خبيزة غَنّاية بنينة وعزيزة،

ونلعن في البيزا الطليانة بالباروني

خبزك ماسوني يا حليلي خبزك ماسوني

خبزك وعجينو خلّى المعدة تولّي فينو

تونستان

كان ياما كان في زمان غير هالزمان، في بعض البلدان اللي تجي بين برّ الوصفان وبرّ الطليان،بلاد إسمها تونستان، كانت تونستان أوّل بلاد تشتعل فيها شمعة الحريّة في وسط صحراء العربان، ولأوّل مرّة رأى العالم على الأرض العربية بلادا تسير نحو بناء دولة تقوم على الحريّة والديمقراطية. ولكنّ الحلم لم يتواصل لمدّة طويلة، لأنّ قوى الظلام وعصابات الخفافيش اجتمعت لتطفئ النور الخفيف المنبعث من الشمعة التونسية. وقد كان ذلك أمرا منتظرا، لأنّ سلالة مصّاصي الدماء وسلالة الحداثيين هي في النهاية سلالة واحدة، تخشى الأنوار وتعشق العمل في ظلام الكهوف أو الدهاليز، ولأنها ترفض أن تنتظر حتى ترى الشمعة التونيسية تتحول إلى قنديل يضيء على الجوار، ومن هناك إلى منارة للحريّة في بلاد العربان عشاق الجاهلية. لهذه الأسباب أخرج الحدثان أقدم كتبهم الصفراء وخطاباتهم المسمومة ومنطقهم الأعوج، وإجتمعو خلف آخر عمامة تغطّي غباءهم الجماعي يرددون شعارات رددها آباؤهم وأجدادهم منذ بداية الزمان: ياعملاء أمريكا، تسقط قطر، تسقط الحكومة المنتخبة، تسقط الديمقراطية، تسقط الحريّة وتعيش الحداثة الفرنسية، تعيش تعيش تعيش... ولكن إلى متى ؟؟؟؟؟

كان ياما كان.. في جربوعستان

كان يا ما كان، في زمان غير هالزمان، في بعض البلدان اللي تجي بين برّ الوصفان وبرّ الطليان، ملك "جنتلمان" يحكم في العربان، ساعات بالعدل والإحسان، وساعات بالمشطة و"البردكان". وكانت البلاد هاذي يا خلاّن، معروفة بإسم "جربوعستان"، كناية على قدرة أهلها على التجربيع كمنهج في الحياة، وكطريقة للبقاء رغم كلّ الصعوبات وتعدّد الأزمات، بحيث كان شعب جربوعستان يتفطم منذ الطفولة الأولى على التحيّل والترهدين، وتدبير الرأس والتكمبين، وقيل في بعض الروايات عن أبي الكشلاف الأمين، أنّو كان عندهم زادة الطحين وقلّة الدين، والله ربّك أعلم بما خفي علينا وعلى عباده المؤمنين، من أعمال الفاسقين المتجربعين.

وكانت في جربوعستان عادة، قريب تولّي عبادة، تتمثّل في أنّهم كلّ ما يتعدّاو ثلاثين ربيع، يختارو ما بيناتهم واحد من أكثرهم قدرة على التجربيع، ويسمّيوه "الجربوع الكبير"، إلّي يقوم ما بيناتهم مقام الملك أو الأمير، ويقودهم بما عندو من حكمة وتدبير، حسب العادات والمسالك الجربوعيّة لتحقيق الأهداف الجماعيّة.

وكان في جربوعستان في هاك الزمان، كيما قلتلكم من المان، ملك جنتلمان، ولد ناس وماهوش جيعان، كما أنّو كان قاري في برّ الألمان، وعندو شهادة تأهّلو باش يخدم صانع "مكسيان". وكان الملك هذا مدعوم من جبهة نيسان، المتكوّنة من المتجربعين القدامى، إلّي طلعوا للحكم في عهد البهامة، وإلّي لقاو فيه أحسن وسيلة، باش يحافظو على بلايصهم بالتجربيع والحيلة. وكان الملك الجنتلمان، المعروف وقتها بجربوع الجرابع الثاني، خايف على مستقبل البلاد وماهوش هاني، ولكنّو عاجز على الخروج على عرف المتجربعين القدامى في مسالك الحكم والإمامة، وخاصّة بعد ما كبر في العمر وخاف لا يقعدو الجربوعستانيّين من بعدو يتامى. وكان من أسباب المخاوف والتهلويس متاع الجربوع الكبير، أنّو ظهر في هاك العصر مرض خطير في بلدان أخرى ما تبعدش عليه كثير، وهو مرض "التكفير المؤدّي للتفجير"، المعروف عند العلماء بمرض "السالافوجيهاديزم كرونيك"، إلّي لا نفع معاه لا الكيّ ولا "الأنتيبيوتيك". ولمّا خاف الملك من وصول العدوى لحدود جربوعستان، وعرف إلّي الناس إلّي عمّل عليهم باش يعاونوه طلعوا سلعة "أنسيان"، موش مواكبة لتطوّرات الزمان، ومازالو عايشين في عالم تجاوزته الأحداث وأصبح مصيره النسيان، عمل خماسو في سداسو، وخدّم الشحمة إلّي في راسو، وبعد سويعة ولاّ سويعتين، غلبو النوم وبدى يشخر وينين، وجاه في منامو المرحوم جربوعبعل، قائد جيوش جربوعستان في عصورها الذهبيّة والرمز التاريخي الكبير لقوّتها الجربوعيّة. وكان جربوعبعل في هاك الحلم لابس جبّة وكلّو في الأبيض من راسو لكرعيه، وبدى بالصوت ينادي فيه، ويقوللو "يا سي المتجربع، قوم لا تتقربع، والبلاد تتفرقع، ودارك تتقرقع، تقعّد قوم يا رأس اللحم المفروم، لا يطيرولك بالمشموم والبلاد تمشي حرام زقّوم لجربوع بولحية قرّوم يعيّش الشعب المظلوم على نغمة المزموم". عاد تفجع هاك الملك المغبون وبدى يرعش تقول درا آشبيه، وقال للقائد اللي صوتو بدى يبعد عليه: يا جربوعبعل ماني خوك، أعطيني آش نعمل يرحم بوك، راهي البلاد بلادك والناس لليوم يحبّوك، وعاملين عليك مجموعات حوار على "الفايسبوك". فقال جربوعبعل بصوت عالي "خمس مائة وواحد يا بوهالي"، وبدى يردّد في هالكلمة ويعيد حتّى صوتو صار بعيد، ووقتها نزع عليه الجبّة وخرج قلم، ورماها للملك المحتار وقاللّو "شوف ظهر الجبّة يا وجه الهمّ، وكان ما فهمتش هاو النمّ"، وأشار إلى أعضائه التناسليّة، وكانت حسب بعض الروايات ذات قياسات عالميّة. زادت فجعة الملك، وهبط على الجبّة يقلّب فيها كيف المدكّ، فإذا بيه يلقى في ظهر الجبّة قربيطة ورديّة اللون، وأوّل فكرة جات لبالو هي أنّو جربوعبعل طلع لبعيدة ميـ***، هو هكّاكة يقلّب في الجبّة ويلوّج على الإجابة، وإذا بيه صوت ولدو الصغير قوّم في القصر ندّابة، من حينك قام هاك الملك مفجوع، يلعن في النهار إلّي إختاروه فيه أكبر جربوع، وقريب يبكي من شدّة ما أثّرت فيه هاك الحلمة، وبالوقت طلب مستشارو الأوّل في الأحلام وقالّو "إيجاني حاجتي بيك في كلمة". من حينك جاه يجري زعيم المستشارين والعزّامة، ومن حينك حكالو الملك المنامة، وطلب منّو تفسير خالي من البهامة.

فكّر هاك المستشار، ودوّرها في دماغو نصف نهار، ومن بعد قاللو "يا سيدنا لقيتها، وراس سيدنا لقيتها"، فرح الملك وقاللو آش لقيت، راني من الفجعة تهرّيت، قول وعندك سلاطة بلانكيط مع حوتة مشويّة في الزيت خالصة في مطعم "لمفيتريت". قال المستشار "يا سيدنا الغالي خلّيها حوتة جغّالي وكعبة شراب من إلّي يحلالي، راهو القائد جربوعبعل يحبّ يقوللك إنّو الحلّ في الشباب، وهذا ممّا لا غموض فيه ولا إرتياب"، فقال الملك "كيفاش يا سي بو العرّيف، فهّمني لا نقطع عليك الرغيف"، فقال المستشار "يا سيدنا الغالي النفيس، الخمسة مائة وواحد راهي ترمز لسروال الدجين "لوفيس"، وهو لباس شبابي للبنات والعتاريس، يلبسوه في بلادنا وماهوش رخيص، وأمّا بالنسبة للقربيطة الورديّة، راهي ماهيش نقص في الرجوليّة، وإنّما ماركة عالميّة في الملابس الشبابيّة لأبناء الطبقة الجربوعيّة العلويّة، ويقولوها "إيدين بارك"، إلّي ما تتباع كان في البلايص إلّي ما تدورش فيها الأمّارك، وما يقدر عليها كان إلّي يخلص بالدولار والدوتشمارك، هذا تفسيري يا سيدنا يعلّي مقدارك، وإلّي باش تعطيني الله يبارك". فرح الملك وقال "هاذي هي، والحلّ هو في تشريك الشباب في القرارات المصيريّة للدولة الجربوعستانيّة"، هيّا يا شسمك نهبّطو صحيّن كمية إلّي هِيَّ، قبل ما نبداو بالمشروبات الكحوليّة، في إنتظار الخرافة تتواصل في تدوينة جاية، والمدوّن ياخذ نفس ويرتاح قبل ما يكمّل الحكاية.

...يتبع.

ملاحظة: كلّ تشابه بين أحداث وشخصيّات القصّة وأحداث وشخصيّات واقعيّة هو من محض الخيال. لم يتمّ إلحاق الضرر بأيّ جربوع خلال تصوير مشاهد هذه القصّة.