قعتّ ساعتين متكونسي قدّام الكلافيي نحبّ نقول برشا حاجات و في نفس الوقت مالقيت ما نكتب و في اللّخر ضربت أخماسي في أسداسي و قلت انا ضايع فيها دون تو لي كا برا نكمّل لأرتيكل لكلّو سؤالات على طريقة فيصل القاسم و ينعبّو اللّي فسدها :
زعمة يجي النهار اللي التونسي يولّي فيه معاش سكيزوفران , النهار اللي التونسي يعرف اللي لاهو من بني يعرب لاهو مالأوروب و اللي تونسي في حدّ ذاتها تززّي باش تقول هو شكون و ما يستحقّش يستورد مالصحراء قالب حاضر و يطبّقوا بالسيف قال شنوّة أصالة و هويّة ؟؟؟؟
زعمة يجي النهار اللي تولّي الشعبويّة جريمة و حدّ ما عاد يكذب و يدجّل عالعباد بحاجات عاطفية تركّحهم و تلعبلهم على مشاعرهم كيما الدين و الأنتماء العرقي و ماعاش نراو واحد يتزبّر و هو شادّ سبحة و سياسي يوعد لعباد باش من غدوة اسرائيل تتنحّى من خريطة الشرق الأوسط ؟؟؟
زعمة يجي نهار نراو الصحافة و الإعلام و باجات الفايسبوك في تونس تجيب أخبار منغير مايقولوا أفاد مصدر موثوق , أكّد مصدر معتمد بوزارة رازبّي , أفاد ظابط ذو رتبة سامية يتحفّظ على اسمه و في اللّخر يطلعوا الكلّ غالطين و يكرّهوك في النهار اللي ولاّت فمّا فيه حريّة عالأقل قبل هاوكا باعثهم ينيّكوا مالمان ؟؟؟
زعمة يجي نهار نراو سمير الوافي موش ماسط و عصام جمعة موش في الأورجو مياة مرّة في الطرح وفي التلفزة يجيبوا حاجة جديدة في العيد آبار قتل حمزة و اقطع ربّ رأسه ؟؟؟
زعمة يجي نهار نراو التوانسة الكلّ يقراو في كتبّات في الميترو و إلاّ في الكار و ماهيش كيف تزيد من جاذبيتّك الجنسيّة و إلاّ كيف تدخل الجنّة في عشرة دقائق و تلقى واحد هبط مكرّز خاطر نطرولو كتاب وقت الدزّان و واحد قعد حاشم خاطر مالقى مايقرى و لعباد تتشوحرلو ؟؟؟؟
زعمة يجي نهار باج تونسيّة في الفايسبوك ما تحطش هذا النيّاك كم يستحقّ من جام و هذه العصبة أنشرها و ما تخلّيش الشيطان يبعبصك و راو الجنّة ساهلة بطرف نزلات عالسوري تنجّم تقصّلها تسكرة و بروميار كلاس زادة ؟؟
برشا سؤالات نحبّ نقولهم أمّا كيما يقولو في التلفزة اللوطانيّة نكتفي بهذا القدر
و توّة نشوف مهاب و لولاد شعملوا باش نحكيلكم عليهم المرّة الجاية
في لامان في لامان في لامان
ليست هناك تعليقات:
إرسال تعليق